Nga dyqanet e suvenireve tek artizanët vendas, mundësitë për të marrë diçka me vete nga Saranda janë të shumta. Për këdo që do të ketë një suvenir, një copëz nga ky qytet, ofrohen mundësi të larmishme zgjedhjesh. Veç objekteve të prodhuara në masë, gjatë Panairit Kombëtar të Suvenireve në Sarandë, një ngjarje që synon të promovojë dhuratat etike, të qëndrueshme dhe rigjallërimin e veprave tradicionale artizanale, ju mund të blini bizhuteri, objekte artizanale të punuara me ar dhe filigran, çanta, tekstile, qeramika etj. Koleksionet e suvenireve janë të frymëzuara nga rrëzëllimi i detit, vendet unike të këtij qyteti, historia dhe arti i tij. Krahas funksionit dekorativ, punimet artizanale dhe suveniret e Sarandës janë krijuar për të qenë të dobishme dhe praktike.